Ayatullah Syed Ali Rizvi ra

مولانا  سید علی رضوی رہ آیت اللہ سید راحت حسین رضوی گوپالپوری کے دوسرے صاحبزادے اور ان کے علوم کے وارث تھے ۔ آپ 15 رمضان المبارک 1330 ھ کو نجف اشرف میں پیدا ہوئے۔ عراق اس وقت ترکی کے زیر اقتدار تھا ۔ 1914 کی دوسری جنگ عظیم میں مولانا سید راحت حسین صاحب بہ ہزار دشواری ماہ صفر 1334 میں مع اہل و عیال وطن واپس آئے۔ مولانا سید علی صاحب نے اپنے والد ماجد سے ابتدائی تعلیم حاصل کی ۔ اس کے بعد لکھنوگئے ۔ وہاں سے واپسی پر اپنے والد ماجد کی مشہور تفسیر انوار القرآن کی ماہوار اشاعت کا سلسلہ گوپالپور سے شروع کیا۔ ( اس سے پہلے یہ تفسیر کھجوہ سے رسالہ الشمس کے نام سے ماہوار چھپتی تھی ) ۔

سنہ 1364 ھ کے قریب آپ ماہ مبارک رمضان کے لئے اترولہ ضلع گونڈہ بلائے گئے۔ آپ کے پر مغز بیانات ، مخلصانہ وعظ و نصیحت اور حق گوئی کا اثر جناب رانی صاحبہ اترولہ اور مومنین اترولہ پر ایسا پڑا کہ ان حضرات نے بصد اصرار آپ کو وہی میں روک لیا ۔

قیام اترولہ کے دور میں آپ قم تشریف لے گئے اور آیۃ اللہ بروجردی کی زیرپرستی علوم دینیہ کی تحصیل کے اعلی مدارج طے کئے ۔ پھر اترولہ واپس آئے ۔ کئی برسوں کے بعد بعض وجوہ سے جناب راجہ صاحب اترولہ سے اختلافات پیدا ہوگئے جس کی وجہ سے آپ نے ریاست سے تعلق ختم کرلیا ۔ لیکن مومنین کے اصرار سے اترولہ ہی میں مقیم رہ کر مومنین کی رہنمایی فرماتے رہے اور اترولہ کو رطن ثانی بنا لیا ۔

مولانا اعلی پایہ کے ذاکر اور واعظ تھے ۔ اردو شاعری میں بھی آپ کا پایہ بہت بلند تھا ۔ عالی تخلص کرتے تھے ۔ امام زین العابدین علیہ السلام کی مدح میں کہے ہوئے ایک قصیدہ کے دو شعر جو یاد رہ گئے ہیں یہاں بطور نمونہ درج کرتا ہوں ۔

گرگیا ہے یوسف کنعان یثرب چاہ میں

اور یعقوب مدینہ یاد ربانی میں ہے

باپ کے دل کا کنول پھولا ہے سطح آب پر

اور سفینہ الفت مادر کا طغیانی میں ہے

آپ کی سب تصنیفیں  اردو میں ہیں:

الفرقۃ الناجیۃ

تفسیر رموز التنزیل

منہاج العرفان

جنات المعارف

ترجمہ اثبات الوصیۃ

دوران طالب علمی میں آپ نے کریسچن کالج لکھنو میں مسیحیوں سے ایک کامیاب مناظرہ کیا تھا ۔

8 ربیع الاول 1400 ھ کو اترولہ میں رحلت فرمائی اور وہیں دفن ہوئے ۔